Поканата за македонскиот премиер да присуствува на инаугурацијата на Доналд Трамп е огромна и одлична можност за Македонија. Шанса преку средби со влијателни личности од администрацијата на новиот американски претседател и дел од неговите најблиски соработници, државава да гради посилно пријателство со САД и презентација на можностите за засилување на економската соработка.
Според познавачите ова го покажува новиот начин на водење на дипломатијата, односно повеќе ја нема онаа сервилност, која беше еден вид заштитен знак минатите седум години. Универзитетскиот професор Звонимир Јанкуловски за Алфа вели дека и повеќе од значајно за Македонија е што премиерот добил покана да присуствува на ваков настан.
-Посетата не се работи за премиерот Мицкоски, се работи за премиер на една држава, на Македонија. И значењето на посетата сам по себе е голем, затоа што поканата е дојдена до премиерот, односно до Макеоднија и се работи за настан, се работи за можност да се сретне со високи функционери во идната администрација на претседателот Трамп, да оствари средби, да гради нови пријателства. Всушност тоа е новиот курс на дипломатијата, вели Јанкуловски.
Дел од луѓето и медиумите блиски од опозицијата минатиов период се обидува поканата да ја прикажат дека воопшто неважна, дека патувањето на владината делегација во САД наводно било бадијала. Според Јанкуловски такво нешто е очекувано, бидејќи тие се обидуваат да прикажат дека само претходната власт имала успеси во дипломатијата и покрај тоа што потпишаа билатерални договори, кои според многумина се катастрофални и сега го блокираат европскиот пат на државата.
-Едноставно штетата, начинот на нивното размислување е штета по државата и да останат на онаа мантра дека големите лидери, односно нивниот голем лидер носеше големи одлуки, кои видовме каде не однесоа во кој ќорсокак не однесоа денеска и оставајќи наследство на новата власт да ги амортизира штетите што се направени од таквите одлуки во надворешната политика, изјави Јанкуловски.
Мицкоски е единствениот лидер од Балканот кој ќе присуствува на инаугурацијата на 47-от претседател на САД, практично најважниот настан во светот во моментов. Дел од владината делегација се и министерот за надворешни работи и надворешна трговија Тимчо Муцунски, вицепремиерот и министер за животна средина Изет Меџити и заменик министерката за европски прашања Викторија Трајков.
Матеја Петровски