Екс-помошник министер и раководителка од секторот за набавки во МВР, во 2018 и 2019-та година договорале тендери во четири очи. Финансиската полиција им поднесе кривична пријава за злоупотреба на службената положба затоа што наместо да спроведат редовна постапка за избор на фирми за поправка и сервисирање на возила на МВР, преку распишување тендер, донеле одлука набавката да се изврши преку итна постапка, без објавување оглас. Покани испратиле само до одредени компании, кои во просек си наплатиле по околу 150 илјади евра. Станува збор за шест фирми односно јавни набавки со вкупна вредност од речиси 800 илјади евра.
- „Врз основа на што првопријавениот Ж. Т. склучил рамковна спогодба по итна постапка со преговарање без објавување оглас, на кој начин првопријавениот заедно со второпријавената овозможиле противправна имотна корист за носителите на набавката “, се наведува во соопштението од Управата за финансиска полиција.
Поранешниот функционер во МВР свесно и со однапред утврдена намера не донел одлука за јавна набавка од отворена постапка за сервисирање на возилата на МВР, иако тоа требало тоа да го стори во декември 2018 година, како што било предвидено со дополнувањето на годишниот план на МВР за таа година, велат од Финансиска.
- „(Тогашниот помошник-министер) не презел дејствија за навремено отпочнување и објавување редовна постапка и ја загрозил безбедноста на вработените во Министерството за внатрешни работи со што ги довел возилата во состојба на дефектажа и неможност да се сервисираат…“, се вели во соопштението на Управата финансиска полиција.
Тогашната началничка на Секторот за набавки, менаџмент и логистика на МВР, Финансиска ја товари зашто не задолжила лице за објавување оглас за јавна набавка и со тоа не им дала шанса на други заинтересирани фирми да учествуваат во постапката.
