Многу пропусти, постапки без ефикасност и заштита на функционирите од СДСМ и ДУИ кои го избраа – ова му тежи на глава на републичкиот обвинител Љупчо Коцевски, за кого Владата почна постапка за разрешување.
Премиерот Мицкоски вели дека Коцевски имал доволно време да се покаже, но и очекува од него самиот да се повлече за да се скрати целата постапка.
- „Имаше тој доволно можност да се размавне, да се покаже како бескомпромисен борец за правдата и против оние случаи каде што има основано сомнение за сторен криминал, но очигледно дека барањето изговори и купувањето време се нечија карактерна особина, така што мислам дека имаше тој доволно време да покаже, за жал таа доверба не ја оправда и сега владата почнува еден процес, денеска бев во Парламентот, тој процес е започнат, Парламентот ќе заврши. Мислам дека чесно и доблесно од него би било самиот да се повлече, да можеме да го скратиме овој период, да можеме да избереме Обвинител кој што бескомпромисен бореќ ќе биде против криминалот и корупцијата во Македонија,“ додаде Мицкоски.
Министерството за правда го подготвува предлогот за разрешување, по што, ќе го достави до Илинденска, па оттаму ќе биде препратен до Советот на јавните обвинители.
Највисокото обвинителско тело ќе треба да донесе мислење во рок од 15 дена, а дополнителни 15 може да има само од оправдани причини. Колегите на Коцевски, може да не се согласат со разрешувањето на републичкиот обвинител, но тоа не ја запира постапката која ќе продолжи во законодавниот дом. На Коцевски ќе му пресудат пратениците кои го имаат крајниот збор.
- „До сега до Советот нема доставено никаков предлог, кога ќе биде доставен ќе се произнесеме “ рече Душица Димитриевска – Претседател на Советот на ЈО.
Една од причините поради кои Владата бара Коцевски да си замине од фукцијата е начинот на кој беше именувана Наташа Крстевска Цилева за шеф на Скопсското вишо обвинителство. За ова претседателката на Советот на јавни обвинители застанува во одбрана на колегата – вели оваа одлука била донесена едногласно.
- „Беше донесена одлука, следејќи ги состојбите во Вишото јавно обвинителство каде вишиот јавен обвинител е оддалечен од функцијата, Советот утврди дека е потребно во ова јавно обвинителство да се назначи обвинител кој ќе раководи со Обвинителството. Таа одлука е едногласна“, рече Димитриевска.
По истекот за законските рокови без разлика дали обвинителскиот советот ќе даде или нема да даде мислење, предлогот за разрешување ќе оди пред Собранието, каде е извесно дека Коцевски ќе биде резрешен, зашто за тоа е потребен само 61 глас.
Според Законот за јавното обвинителство, републичкиот обвинител се разрешува од функцијата пред истекот на мандатот поради тешка дисциплинска повреда или ако е член во политичка партија.
Како тешки дисциплински повреди се сметаат намерно или неоправдано правење на крупни професионални грешки, било каква судска пресуда, неизземање во случаи кога требало да се изземе од постапување, издавање на класифицирани информации од истрага и од судења, недолично донесување и кршење на јавен ред и мир, неподнесување изјава за имотна состојба.
