Штип во наредните три дена ќе живее со Фестивалот на забавни мелодии „Макфест“. Годинава е со во знакот на 40. јубилејно издание на „Макфест“, а на сцената на Центарот за култура „Ацо Шопов“ во Штип ќе се испејат новите хитови.
Фестивалот на забавни мелодии „Макфест“ денеска почна со кревање на макфестовското знаме кај хотелот Оаза. Градоначалникот на Општина Штип, Иван Јорданов го означи почетокот со порака дека „Макфест“ останува симбол на Штип и на македонската песна.
-Оваа година одбележуваме 40 години постоење, јубилеј. Во име на тоа сакам да се заблагодарам на основачот на на овој фестивал Стојан Троицки, да се заблагодарам на сите уметнички директори, кои што низ годините наназад го одржувале „Макфест“, додавале вредност на македонската музичка сцена. Но, и на сите композитори и музичари, кои се поврзани со „Макфест“, кои низ годините наназад и оваа година се практично појавиле, овозможиле да се збогати македонската забавна музика, изјави Јорданов.
Во првите две фестивалски вечери публиката ќе ужива во новите музички хитови, создадени специјално за јубилејното издание. Третата вечер, в сабота ќе биде посветена на незаборавните хитови, шлагери и победниците што се дел од 40 годишното постоење на „Макфест“.
-Со оглед на тоа што годинава „Макфест“ слави голем јубилеј, фестивалот е посветен на домашната музичка сцена. На истата ќе настапат исклучиво изведувачи од земјава, како почит кон македонската песна, вели Александар Арсовски продуцент од Општина Штип.
Оваа година македонската забавна сцена, ќе биде збогатена со нови 27 композиции. Уметничкиот директор на „Макфест“, Роберт Саздов вели фестивалот кој со децении претставува симбол на Штип и оваа година ја продолжува традицијата на негување на домашната музика.
-„Макфест“ е една успешна приказна, потврдена. Четири децении не е шала. Јас како што знам само Евровизија, подолго трае од Макфест. Се продуцирани и објавени над 1.200 композиции, 27 се нови вечерва Меѓутоа, тоа се стотици и стотици хитови , на коишто сите добро ни се познати, вели Саздов.
Фестивалот е финансиски поддржан од Општина Штип, Министерството за култура и општествено-одговорни компании. Организаторите најавија дека секој ден во 12 часот додека трае „Макфест“ ќе има прес-конференции на коишто ќе се откриваат деталите околу фестивалските вечери. Македонската публика и оваа година „Макфест“ ќе го следи во живо на јавниот сервис.
