По повеќе од две и пол децении под лупа, Македонија конечно излезе од постмониторингот на Советот на Европа. Парламентарното собрание во Стразбур со резолуција оцени дека државава направила напредок во демократијата, владеењето на правото и човековите права, а од сега ќе се следи како и другите земји-членки, преку редовен механизам.
Во резолуцијата се нотира напредокот во клучните демократски стандарди и се признава политичката волја за исполнување на обврските што Македонија ги презеде со членството уште во 2000 година.
За премиерот ова е признание за демократијата која владее во земјата и сите процеси кои ги моноторира Советот на Европа.
- „Пред неколку дена ми беше поставено прашање дали Владата влијае на слобода на медиумите. Еве еден најголем демант за квалитетот на демократријата, слободата на говорот… Јас сум благодарен за тимската работа. Ова е уште една добра вест… а во следниот период ќе има уште многу добри вести.. Советот на Европа вели дека Македонија е зрело демократрско општество, владее правото, нема замолкнување на слободна новинарска мисла, и таа држава е зрела за разлика од другите држави во Западен Балкан вклучително и фронтранерите“ ,рече Мицкоски.
Усвоената резолуција е заснована врз извештајот на Сибел Арслан од Швајцарија и Џозеф О’Рајли од Ирска, при што Советот ги поздрави мерките што властите во Македонија ги презедоа за реформа на судството и обвинителските служби, како и работата на владата на предлог-законите за Судскиот совет, Јавното обвинителство и Советот на јавни обвинители.
Усвоениот текст го истакнува и брзото формирање на коалициската влада по парламентарните избори во мај 2024, која покажала „политичка волја и посветеност целосно да ги исполни своите обврски преку нејзината континуирана соработка со телата на Советот на Европа, вклучително и Венецијанската комисија“. Советот ги повика властите да го реформираат Изборниот законик со спроведување на преостанатите препораки на Венецијанската комисија и ОДИХР на ОБСЕ.
Во работата на јануарската сесија учествуваше и македонската парламентарна делегација, предводена од заменик-шефот Иванка Василевска, заедно со пратениците Беким Ќоку и Бисера Костадиновска-Стојчевска.
Пратечниката Василевска оцени дека одлуката е јасен сигнал од Европа, посочувајќи ги фер изборите, мирната смена на власта, изборот на првата жена претседател и резултатите во борбата против корупцијата, кои, како што рече, се потврдени и од ГРЕКО.
Со ова завршува 26-годишниот процес на следење на исполнувањето на обврските преземени од земјите-членки според условите на Статутот на Советот на Европа, Европската конвенција за човекови права и сите други конвенции склучени во рамките на Организацијата на кои се обврзале земјите-членки.
