Постојаната потреба на човекот да ја бара смислата на животот е концептот на најновата театарска претстава на штипскиот Народен театар, во режија на Дејан Пројковски. Сцената на претставата „Пијани-литургија зеро„ претставува напуштена спортска сала која ја симболизира умешноста на малиот човек кој жонглирајќи проба да преживее, но и да ги остварува своите соништа.
„Нашата претстава е уште еден обид современиот човек да ја бара дифиницијата за љубов, среќа, што значи пријателство, што значи љубов, постојаната потреба на човекот да го разбере постоењето на Бог и смислата на универзумот и зошто е човекот важен или воопшто неважен и е само една точка во целиот тој систем и космос„ изјави режисерот, Дејан Пројковски.
Потписот на музичкиот дел во претставата „Пијани„-литургија зеро, е на Горан Трајковски, кој вели дека и за ова театарско дело создал музика која заедно со сценографијата, ќе го надополни режисерскиот концепт.
„И оваа претстава како и сите други ќе биде полна со енергија, со акција, со големи контрасти, скокови, падови, нормално драмски. Музиката во театарската претстава не е наменета за слушање, туку да биде неодвоив дел од самата претстава и да не се надвиснува над неа„ изјави музичарот Горан Трајковски.
Претставата „Пијани„ е работена по текстови на Хајам, Вирипаев и Достоевски, а е поддржана од Министерството за култура
Александра Ристевска
