Од денеска до 15 септември во Отешево ќе се одржи петтото издание на „Зрно“ – фестивал за алтернативна фотографија, кој и годинава ќе собере фотографи и автори од повеќе европски земји.
Фестивалот е посветен на алтернативните фотографски процеси, аналогната фотографија и експерименталните пристапи во визуелната уметност, а во неговите активности ќе учествуваат околу триесетина фотографи од Германија, Австрија, Унгарија, Словенија, Романија, Хрватска, Турција, Украина, Србија и Македонија.
Во текот на седумте фестивалски дена учесниците ќе работат на различни работилници посветени на аналогни и алтернативни фотографски техники, ќе разменуваат искуства и ќе реализираат заеднички проекти во амбиентот на Преспа.
Организаторите посочуваат дека „Зрно“ низ годините се етаблирало како едно од препознатливите места во Европа за учење и размена на знаења во областа на алтернативната фотографија.
Покрај работилниците, предвидена е и јавна програма. На 11 септември во Центарот за култура во Ресен ќе бидат отворени изложби на уметниците Андраш Согор од Будимпешта и Тома Димовски од Скопје, по што ќе следува филмска проекција.
На 12 септември фестивалската програма продолжува на плажата во Отешево со диџеј-сет „Зајдисонце и нова месечина“ на Мартина Пенева.
Организаторите велат дека и годинава „Зрно“ ги обединува фотографијата, експериментот, природата и меѓународната соработка, создавајќи простор за креативна размена и нови уметнички практики.
