Во Македонска Каменица денеска се одржа втората сесија на Проектниот форум, во рамки на проектот „Зајакнување на општинските совети – Фаза 2“, на која пред граѓаните беа презентирани пет концепт-проекти произлезени од предлозите дадени на првата форумска сесија.
Меѓу предложените проекти се изградба на Музеј на рударството, уредување на патека на Калиманско Езеро, воспоставување ЕКО пазар во Македонска Каменица, изградба на училишен кампус и реконструкција на водоводната линија во село Дулица.
За секој од концептите учесниците имаа можност да дискутираат, да дадат мислења, забелешки и дополнителни предлози, со што процесот на дефинирање на локалните приоритети продолжува директно со вклучување на граѓаните.
Од Општина Македонска Каменица посочуваат дека токму ваквиот пристап овозможува идниот приоритетен проект да биде усогласен со реалните потреби на локалната заедница.
За реализација на приоритетниот проект обезбеден е проектен фонд од 30 илјади американски долари, при што Општина Македонска Каменица учествува со 50 проценти од средствата.
Проектниот форум е дел од проектот „Зајакнување на општинските совети – Фаза 2“, финансиран од Владата на Швајцарија и Министерството за локална самоуправа, а кофинансиран и спроведуван од УНДП во соработка со национални и локални партнери.
Процесот продолжува со избор на приоритетниот проект, а крајната цел е средствата да бидат насочени кон иницијатива која ќе има најголемо значење за жителите на Македонска Каменица.
