Потокаловата фаза во која влезе Македонија со пеколни температури над 40 степени ќе удри и по џебот на граѓаните. Клима уредите се единствениот спас од горештините, а според податоците на ЕВН, потрошувачката на струја во првата половина на јули е зголемена за 11 % во однос на ланскиот период, истиот месец.
Според податоците на ЕВН, во месец јули потрошени се 254.492 мегават часови, што се должи на високите температури. Минатата година вкупната потрошувачка на електрична енергија, за периодот 01 до 17 јули изнесувала 229.575 мегават часови. Оттаму појаснуваат дека разликата се јавува заради температурите.
Поради вклучените клими, но и поради новата цена на струја повисока за 0, 5 %, на домаќинставата коишто влегуваат во потрошувачка на првиот и вториот блок, граѓаните очекуваат и посолени сметки.
Според последните најави од УХМР високите температури ќе се задржат и наредниот месец. Ако во јули потрошувачката е зголемена над 10 %, очигледно дека потрошувачката на струја ќе продолжи да се зголемува.
Рекорден ден според потрошувачката во екот на топлотниот бран бил 17 јули кога биле потрошени 17.018 мегават часови.
Освен Македонија, топлотниот бран ги зафати и останатите земји од Западен Балкан поради што Србија го урна и рекордот со потрошувачка на струја.
