Пехчево на 13 јуни годинава ќе биде центар на младите, спортот и забавата преку одржувањето на „Пехчево Младински Фест 2026“, настан што го организира Локалниот младински совет Пехчево во соработка со Општина Пехчево, Делегацијата на Европската Унија и партнерите на проектот „ЕУ со тебе“.
Фестивалската програма започнува во утринските часови со традиционалната планинско-велосипедска тура „Пехчево на Точак“. Стартот е закажан во 9 часот од плоштадот „Св. Петар и Павле“ во Пехчево, а учесниците ќе возат по патека долга околу 33 километри до врвот Кадиица. Организаторите информираат дека патеката е со средна тежина, учеството е бесплатно, а на крајната дестинација е предвиден заеднички ручек за сите учесници.
-За учество во велосипедската тура задолжително е носење кацига, а учесниците треба да обезбедат технички исправен велосипед, резервна гума, пумпа и основен алат. Препорачливо е да понесат вода, храна и соодветна облека за планински услови. Малолетните лица можат да учествуваат само во придружба на возрасен- информираа организаторите.
Во попладневните часови, од 17 часот, на плоштадот во Пехчево ќе бидат отворени повеќе тематски зони наменети за младите и посетителите. Предвидени се зона за уметност, зона за друштвени игри и натпреварувачка зона со различни активности и содржини.
Музичкиот дел од програмата започнува во 22 часот, кога фестивалот ќе продолжи со настап на пејачката Анастасија Спасевска и DJ DOOMLOAF, кои ќе се погрижат за забавата до доцните вечерни часови.
Организаторите ги повикуваат сите љубители на велосипедизмот, рекреацијата и добрата забава навреме да го пријават своето учество во велосипедската тура, најдоцна до 10 јуни, и да бидат дел од еднодневниот фестивал што ќе ги обедини спортот, културата и младинскиот активизам во срцето на Малешевијата.
