Со законскиот рок, 15 декември за официјалрен старт на откупот на тутунот, процесот се динамизира. Десетте лиценцирани откупувачи ги отворија сите откупни пунктови со 337 ваги и според првичните проценки досега се откупени над 11 милиони килограми што значи дека до Нова година се очекува да биде откупен целиот квалитетен, односно сув тутун.
„Динамиката е зголемена заради тоа што тутунопртоизводителите се задоволни од самиот начин на купување тутун, се купува сето на прва класа, во моментов не се одбива кало, просечната цена е негде 420 денари, односно на вкупната сума на сите количини што се откупени е 419,86 ден. просечна цена. Од оваа цена се задоволни и тутунопроизводителите и тутунот сакаат да си го предадат што посокоро и да дојдат до заработените пари“, – вели Кире Ристески, претседател на Сојузот на тутунски здруженија.
И не само тутунарите, туку и откупувачите брзаат да откупат што повеќе тутун, бидејќи годинава родот е со висок квалитете, но количински е помалку од она што го очекуваа откупувачите. А истовремено и испалата се врши без застој, односно за 3-5 работни дена од предавањето на родот.
„Досега имам донесено околу 1.600 кила, а имам уште. Генерално, сум задоволен, макар што на почетокот имаше нешто „повлечи-потегни“, но сетоа тоа се нормализира. Е сега, морам да кажам, тутунарите се надеваа на некои 20-30 денари плус, во тоа не се успеа од икс причини, ама генерално сме задоволни и од откупувачите“, – кажа Ристо Џамбазов, тутунопроизводител.
„Договори склучуваме бидејќи не смееме да садиме тутун без склучен договор. Затоа сме принудени напролет да склучиме договори без разлика дали има или нема цена. Тоа треба да се земе во предвид, оти не е слободен тутунот, тутунот е под заштита на државата“, – рече Аце Наумоски, тутунопроизводител.
Годинава, според Сојузот се очекуваат да бидат откупени вкупно околу 22 милиони килограми квалитетен тутун. Оттаму уверуваат дека нема да остане ниту едно кило неоткупен род, со тоа што сега влажниот тутун ќе се откупува подоцна, односно после Нова година, па се до крајот на откупната кампања заклучно со 28 февруари.
