Вооружениот напаѓач кој пукаше на гала-вечерата во Вашингтон денеска ќе биде изведен пред сојузен суд и обвинет за напад врз службено лице, пукање со огнено оружје и обид за убиство на службено лице. Американските медиуми го идентификуваа како 31-годишниот Кол Томас Ален од Торанс, Калифорнија.
Американскиот претседател Доналд Трамп за „Фокс њуз“ изјави дека осомничениот имал антихристијански ставови, додавајќи дека станува збор за „болен човек“. „Ако го прочитате неговиот манифест, тој ги мрази христијаните, тоа е сигурно“, рече Трамп, без да даде дополнителни детали за документот.
Тој посочи дека и членови на семејството на осомничениот им дале информации на безбедносните власти за неговите ставови.
Инцидентот се случи на гала-вечерата во Вашингтон со дописниците од Белата куќа, кога осомничениот се пробил низ контролен пункт и испукал неколку куршуми пред да биде совладан од безбедносните сили. Трамп и другите гости беа евакуирани од салата.
Мотивот на осомничениот сè уште се утврдува, изјави државниот обвинител Тод Бланш, додавајќи дека според првичните наоди, цел му биле Трамп и членови на неговата администрација. На листата на цели во манифестот се наоѓале функционери од администрацијата, но не и директорот на Федералното биро за истраги, Кеш Пател, како и лица на различни нивоа во хиерархијата, од највисоки до најниски.
