Нечесен гест од ЕУ – вака премиерот на Унгарија, земја која претседава со Европската унија го оцени потегот за старт на преговорите со Албанија, но не и со Македонија.
Унгарскиот премиер Виктор Орбан кој е во посета на Македонија и кој се сртена со македонскиот премиер, Христијан Мицкоски во Охрид одлуката на ЕУ ја нарече грешка.
„Народите и државите на Западен Балкан заслужуваат многу повеќе отколку што добиваат од Брисел. Северна Македонија заслужува да биде дел од ЕУ. Таа е кандидат заедно со Хрватска, 2008 заедно со Хрватите добија позитивно мислење, од тогаш Хрватите се членки, а со Македонија не се започнати преговорите, и таа е историска грешка на ЕУ. Но, може сега да се каже дека таа грешка е двојно поголема, затоа што Северна Македонија ќе биде ставена позади Албанија, и не гледам никакви причини за тоа. Ова ќа биде огромен предизвик за оваа влада, за да се бори со овој нечесен гест од ЕУ“, рече Орбан од Охрид.
Тој посочи дека во Македонија доаѓа во период коха се одбележуваат 30 години од воспоставувањето на дипломатските односи меѓу двете земји.
„Ставот е добро познат на Унгарија. Многу е важна стабилноста на Западен Балкан. Зачленување на државата е огромна можност, за сите членки кои се дел од ЕУ, така и Унгарија, сите видовме дека добивме многу во напредокот на земјата, но ЕУ во меѓувреме ја загуби својата динамика, и затоа мораме да се избориме за ново проширување. Не го одминуваме ниту фактот дека Украина и Молдавија добија на некој начин вонредно забрзани постапки за зачленување. Мора да го имаме пред себе геополитички фактори, но мораме да имаме во предвид дека државите кои долго чекаат сега се во втор план, а тоа не е фер. И затоа сметаме дека е важно Западен Балкан да биде дел од ЕУ, и затоа сакаме брз процес на зачленување на Северна Македонија во ЕУ“, рече Орбан.
