Земјоделците од Неготино кои минатата година претрпеле штети од ниските температури добија финансиско обештетување, информираа денеска од неготинската локална самоуправа.
Општина Неготино соопшти дека се работи за производителите на земјоделски производи кои имале и пријавиле штети настанати од ниските температури минатата година. Исплатени биле средствата како обештетување во висина од 1.420.929 денари за сите земјоделци.
– Средствата се исплатени врз основа на извршните проценки на стручната комисија формирана од Општина Неготино, што работеше на констатирање на состојбата на терен и вршеше проценка на вкупната настаната штета – појаснија од локалната самоуправа.
Притоа, додадоа дека согласно позитивните законски прописи, Владата врши исплата на пет отсто од висината на штетите, па токму затоа на сметките на земјоделците биле префрлени 1.420.929 денари.
