Советот на Општина Маврово и Ростуше, на предлог на градоначалникот Онер Јакупоски, донесе одлука насочена кон поттикнување на локалниот економски развој и поддршка на младите претприемачи.
-Новата мерка предвидува конкретна поддршка за физички лица на возраст од 18 до 29 години кои се постојани жители и сакаат да основаат сопствено трговско друштво (фирма) на територијата на нашата општина, информираа од општината.
Додаваат дека главниот фокус на оваа одлука е олеснување на почетните чекори во бизнисот преку обезбедување на бесплатна правна помош, како и консултативна поддршка за младите сограѓани кои планираат својата професионална иднина да ја градат во родното место.
-Младите се движечката сила на нашата заедница. Со оваа мерка сакаме да им порачаме дека општината е нивен партнер, кој ќе им помогне полесно да ги поминат административните пречки и да ги реализираат своите бизнис идеи- истакнал градоначалникот Јакупоски, нагласувајќи дека локалниот економски развој е негов прв приоритет.
Посочил дека локалната власт во континуитет ќе продолжи да создава услови и да спроведува мерки за поддршка на сите групи граѓани, со цел подобрување на економскиот стандард и квалитетот на животот во регионот.
Општинските служби, како што наведуваат од општината, се подготвени во секој миг да им помогнат на заинтересираните за сите информации.
