По серијата пожари во изминатите години, општините од регионот не чекаат последен момент, туку навреме се подготвуваат за летната сезона. Општина Карбинци формира доброволно противпожарно друштво „Баргала“, со цел навремена превенција и брза реакција при евентуална појава на пожари во текот на летото.
Формирањето на доброволното друштво е од особено значење за општината, со оглед на фактот дека досега во вакви ситуации се потпираа на штипската противпожарна единица. Со новото друштво Карбинци ќе може самостојно да се справува со огнените стихии, кои изминатите години беа честа појава.
„Ќе преземеме чекори кои ќе бидат важни за превенција од пожари кои би се случувале на територијата на Карбинци, но ќе бидеме и подготвени да одговориме на нивото на задачата. Ова е од голема важност за една мала општина како што е нашата“, изјави градоначалникот на Карбинци, Виктор Паунов.
Засега пријавени се околу 12 доброволци, објаснуваат од граѓанското здружение ЛАГ Плачковица, кое го имплементира проектот. Сите ќе поминат обуки и ќе бидат оспособени за директна интервенција на терен. Истовремено, со поддршка на општината, Дирекцијата за заштита и спасување и донации, започната е постапка за обезбедување противпожарна опрема.
„Сега општините се справуваат со поплави, меѓутоа овие доброволци, освен што ќе може да интервенираат во пожари, во иднина на нив ќе може да се смета за вклучување и во други интервенции кои се за поддршка на заедницата на граѓани“, изјави Столе Георгиев, од граѓанското здружение ЛАГ Плачковица.
Вакви доброволни противпожарни друштва граѓанската иницијатива, освен во Карбинци, има формирано во Штип, Кочани и Радовиш. Најактивни се друштвата во Свети Николе, Кочани и Пехчево.