Општина Илинден започна со реализација на проектот за реконструкција на локалниот пат Илинден-Јурумлери, значаен инфраструктурен зафат со кој ќе се подобри сообраќајната поврзаност со соседните општини Петровец и Гази Баба, инфомрираат од локалната самоуправа.
Реконструкцијата, како што посочуваат, опфаќа целосна обнова на постоечкиот коловоз во вкупна должина од околу 500 метри, како и уредување на системот за прифаќање и одведување на атмосферските води.
Градоначалникот на Општина Илинден, Александар Георгиевски, изврши увид во текот на градежните активности, истакнувајќи дека овој патен правец е од особена важност за подобрување на локалната и регионалната сообраќајна поврзаност.
Општина Илинден го реализира проектот во соработка со Центарот за развој на Скопскиот плански регион и Бирото за регионален развој, со што се реализира инвестиција од значење за целиот регион. Со ваквите прокети, општината ја потврдува својата заложба за унапредување и модернизација на патната инфраструктура, придонесувајќи за поквалитетни и побезбедни услови за одвивање на сообраќајот.
