Во Министерството за локална самоуправа денеска беа потпишани договори за реализација на два инфраструктурни проекти во Општина Берово, насочени кон подобрување на локалната инфраструктура и условите за живот на граѓаните.
Како што информираше градоначалникот Петар Ружински, станува збор за реконструкција на крак 1 и крак 2 од улицата „15-ти Корпус“
-За реализација на оваа активност се одобрени 2.677.646 денари, како и за оградување и партерно уредување на дел од локалниот пат „Берово – Абланица“ преку Црвен Брег, за што се обезбедени 443.539 денари, информираше Ружински.
Средствата се одобрени од Министерството за локална самоуправа во рамки на Повикот за финансирање за намалување на диспаритетите меѓу и во рамки на планските региони и зголемување на регионалната конкурентност за 2026 година.
Ружински изрази благодарност до Министерството за локална самоуправа за поддршката и, како што посочи, препознавањето на потребите на општината.
– Со овие инвестиции продолжуваме посветено да ја унапредуваме инфраструктурата, преку побезбедни улици и патишта, поуредени јавни површини, подобра пристапност и поквалитетно секојдневие за сите граѓани, истакна Ружински.
Со реализацијата на проектите се очекува подобрување на безбедноста и условите за движење на жителите, како и унапредување на локалната патна инфраструктура во Берово.
