На Али Ахмети му смета што неговата партија нема шанса да стигне до премиерското место или пак, што актуелниот премиeр, како минатите, не игра како што тој свири. За него, ова, но и расчистувањето на партиските кадри на ДУИ низ институциите, било уназадување на правата на сите Албанците. Помош за ова бара од косовската влада, која одржа заедничка седница со македонската.
-Од нула учество во јавната и државната администрација, Албанците успеаја да создадат историја со изборот на првиот премиер Албанец во Македонија. Ова не беше само триумф за Албанците, туку и победа за идејата за еднаквост меѓу народите и дека секој граѓанин, без разлика на етничката припадност, заслужува еднакви можности. Денес, овие достигнувања се во опасност од уништување, велат од ДУИ.
Ахмети кажа дека побарал од косовскиот премиер Албин да разаговара со Христијан Мицкоски за овие проблеми.
-Испратив повик, апел до Владата на Косово да ја пренесе загриженоста на Албанците од Македонија до премиерот на Македонија и упатив апел до сите политички партии во Косово да ја разгледаат загриженоста на Албанците од Македонија за обидите за промена на законот за јазиците, промена на договорот, суштината на Охридскиот мировен договор. Да не бидеме рамнодушни, бидејќи нашите историски заложби беа заеднички, во однос на обезбедувањето на слободата, изградбата на државата Косово и во однос на политичко-правниот статус на Албанците во Македонија, вели Ахмети.
Од коалицијата „Вреди“ пак велат дека промената на власта донела до зајакнување на односите меѓу Македонија и Косово.
-Со доаѓањето на ВРЕДИ ВО Владата на Македонија, односите меѓу двете држави само се продлабочија и соработката се зголеми. кога со земјата управуваат вистинските луѓе, не недостасуваат правилни одлуки. Оттука, одлуката на Владата на Македонија да ја одржи првата меѓувладина средба во Приштина е една од најдобрите одлуки што докажува дека нашата земја е заинтересирана и вложи напори за градење на односи на задоволително ниво со соседите кои не опкружуваат, потенцираат од партијата на власт, велат од Вреди.
Националистичката реторика последниов период станува еден вид заштитен знак на ДУИ, Ахмети дури и кажа дека Албанците ќе станеле на нозе, доколку Уставниот суд донесел одлука за измени или укинување на законот за јазици.
Матеја Петровски
