Истрагите за скандалот со Онкологија и пожарот во тетовската модуларна болница се влечат со месеци, па и со години.
Скандалот со онкологија можеби и ќе доживее обвинение до крајот на месецот, но за набавката на опоќарената модуларна болница во Тетово и останатите 18, Обвинителството за организиран се уште не се произнесе дали навистина крив е само кабелот и дали ќе има одгвоорност кај велешката фирма „Брако“ и валандовската „Ари и Том“ коишти ги добија тендерите.
За Онкологија истрагата финишира. До крајот на месецов се очекува Обвинителството да поднесе обвинение за скандалот на Онкологија. Се чека на вештачењата од странство, а обвинителите во целост ги завршија последните испрашувања на одредени вработени и пациенти.
До крај на јануари се очекува да пристигне и второто медицинско вештачење од Словенија, каде беа испратени поголем дел од медицинските истории. Првиот дел од Србија стигна, а завршени се и деталното економско вештачење за работата на клиниката и последните распити на лица. Така што по приемот на ова вештачење за кое е доставен одреден прелиминарен наод, ќе следува јавнообвинителска одлука, инфомираат од Обвинителство.
За набавката на модуларните болници што беа монтирани за време на Ковид пандемијата, Обвинителството за органзиран цели три години води предистрага. Засега, крив е кабелот за пожарот во кој загинаа 14 луѓе. Се уште не се знае дали тендерот бил законски и дали модуалрните болници ги исполнувале сите критериуми за нивно поставување.
Документацијата што по наредба на јавниот обвинител беше дополнително побарана, а за што предметниот обвинител информираше на неодамнешниот брифинг е пристигната и веднаш со наредба за спроведување на сеопфатна анализа е дадена на истражител од Истражниот центар во ОЈО ГОКК. Се очекува истата да биде анализирана во наредниот период, по што ќе биде донесена јавнообвинителска одлука за понатамошниот тек на постапката, информираат од Обвинителство за организиран криминал.
За време на пандемијата беа поставени 19 модуларни болници. Откако се случи трагедијата во Тетово, Обвинителството за организиран криминал отвори истрага по допрен глас и од Бирото за јавни набавки и Министерството за труд и социјална политика ја зема севкупната документација поврзана со изградбата на сите болници. Тендерот за изградба на модуларните болници го добија велешката фирма „Брако“ и валандовската „Ари и Том“ по скратена постапка, без претходно објавен оглас. Тие ја добија ваквата „привилегија“ со цел побрзо да се изградат и таму да се сместат пациенти заразени од Ковид 19, со оглед на тоа што сите здравствени капацитети во земјава беа преполни.
