Градоначалникот Ѓорѓиевски нагласи и дека изворот Рашче е под постојан 24-часовен надзор, со видеонадзор и физичко обезбедување. Депонијата за која наводно се крена паника дека предизвикува енормно загадување во заштитеното подрачје на изворот не се наоѓа на територијата на Градот, потенцираше Ѓорѓиевски, туку на околу 30 километри од Рашче.
Скопското Основно јавно обвинителство, пак, оформи предмет по допрен глас за да ги провери информациите околу евентуалното загадување на природата со отпад во близина на изворите.
Како што наведуваат од Обвинителството, надлежен јавен обвинител ќе ги координира активностите на Државниот инспекторат за животна средина и надлежните инспекциски служби, со цел да се утврди потеклото на депонијата, како и евентуалните последици врз животната средина.
Водовод и канализација, пак, потврдија дека водата од 42 примероци од различни делови на главниот град, меѓу кои и потегот Нерези–Лепенец, е чиста и безбедна.
