Седумнаесет години од кобниот 12 јануари 2008 година кога загина целиот екипаж на хеликоптерот МИ – 17. кој се враќаше од мировната мисија, Алтеа, во Босна и Херцеговина. 11 припадници на Армијата на Македонија го загубија животот кај катлановско Блаце, каде се урна армискиот хеликоптер на педесетина метри од селските куќи.
Со едноминутно молчење и полагање цвеќе на спомен обележјето, денеска почит им оддадоа делегации од Министерството за Одбрана, Генералштабот на Армијата, предводени од министерот Владо Мисајловски и генералот – мајор, Сашко Лафчиски како и семејствата на загинатите војници.
Министерот рече дека вакви несреќи се случувале и во минатото, но дека најважно е жртвите никогаш да не бидат заборавени.
„За жал и во минатото се случиле вакви трагедии, секогаш може да се случат. Ова е веќе пред 17 години чинам, 2008 година се случи по враќање на нашите мировници од една мисија во Алтеа, во Босна и Херцеговина, каде што при враќање се случи тоа што се случи, за жал. Имаше во тој период и истрага, што не се докажа до крајот што се случило и експерти имаше инволвирано, но најважно е да оддадеме почит и никој од нив не биде заборавен. Бидејќи тие се македонски херои и сите луѓе што работат во Армијата и моментално, но и во минатото, треба да ги почитуваме. За жал се случуваат несреќи и еве сведоци сме по 17 години на еден ваков чин за жал“, рече Владо Мисајловски, министерот за одбрана на Македонија.
Македонските мировници кои се враќаа дома по шестмесечната мисија во Алтеа, на 12 јануари полетаа од базата Бутмир кај Сараево. Требаше да слетаат на воениот дел во скопскиот Аеродром, а последниот контакт со контролната кула, леталото го направило на шест милји од целта.
„И по 17 години се уште се свежи сеќавањата од трагичната несреќа кај катлановско Блаце, каде животот го загубија 11 припадници на армијата. Тука на спомен обележјето повеќе делегации од Министерството за одбрана и армијата положија свежо цвеќе во нивен спомен“.
Во несреќата загинаа потполковник Тони Спасовски, мајор Горан Ристовски, капетаните Бране Спасовски и Игор Ѓорески, заставниците, Славчо Василев и Тони Давитковски, постарите водници Јанко Шириќ и Мики Ивановски и Александар Тасковски и Александар Васиќ, како и десетарот Златко Вељановски.
Љубиша Владимиров
