Последен ден без казни и само со опомени за брзо возење. Од полноќ „Сејф сити“ официјално почнува со работа, а сите сообраќајни прекршоци регистрирани од камерите ќе се санкционираат автоматски.
По завршувањето на пробниот период, системот влегува во целосна функција, со евидентирање на брзо возење, минување на црвено светло и непрописно запирање и паркирање. Дополнително, преку автоматско читање на регистарските таблички, системот ги споредува податоците со базата на МВР и детектира возила со истечена или невалидна регистрација. Системот не го идентификува возачот туку казната оди директно до сопственикот на возилото.
Надлежните велат дека целта не е казнување, туку зголемување на безбедноста и намалување на сообраќајните незгоди.
Во првите 24 часа од тестирањето на ‘Сејф сити’ беа регистрирани над 110.000 прекршоци – очигледно многу од нас досега возеле како сакаат. Од утре, единствениот начин да избегнете казна е да ги почитувате правилата.“
За пречекорување на брзината до 20 километри на час казната изнесува околу 20 евра, од 20 до 30 километри – 45 евра, а за поголеми пречекорувања казните достигнуваат и до 300 или 400 евра, со можност за привремено одземање на возачката дозвола.
За минување на црвено светло предвидена е казна од околу 250 евра, додека непрописното паркирање ќе се санкционира со 30 до 50 евра. За возило со истечена регистрација казната оди до сопственикот на возилото.
Казните ќе пристигнуваат директно до сопствениците, а доколку се платат во законскиот рок, предвидено е и намалување на износот.
Граѓаните се со поделени ставови. Дел веруваат дека „Сејф сити“ ќе воведе поголем ред во сообраќајот, други стравуваат од нов финансиски товар.
Од утре, „Сејф сити“ повеќе не е тест, туку реалност што се случува на улиците.
