Кривичната пријава против Оливер Спасовски, поснедена од ВМРО-ДПМНЕ, најверојатно ќе заврши во некоја од фиоките во Јавното Обинителство. Оттаму за Алфа велат дека нeмало да се оформи посебен предмет бидејќи за хаосот со личните документи веќе имале предистрага по иницијатива на граѓанин. Додаваат дека она што го добиле од опозициската партија единствено би можело да се припои кон предистрагата.
Основното јавно обвинителство Скопје веќе постапува по претходно поднесена кривична пријава во врска со истите наводи. Во предметот веќе се побарани информации од надлежни институции. Дополнително поднесените пријави ќе бидат приклучени кон истиот предмет и обвинителството во целост ќе ги провери наводите, велат од ОЈО.
Ова отвора повеќе дилеми – зошто ОЈО досега молчело за целиот хаос и дали можеби се обидува да го заштити Оливер Спасовски со тоа што не отвора посебен предмет.
Поранешниот државен обвинител Јовески никогаш не обелодени дека е оформен предмет за хаосот со личните документи. Очигледно и на неговиот наследник, Љупчо Коцевски не му се брза да отвори истрага, но затоа пак, на првиот работен ден тој формираше комисија за следење на изборни нерегуларности за што преку соопштение експресно ја информираше јавноста.
ВМРО-ДПМНЕ поднесе кривична пријава против Оливер Спасовски бидејќи според нив министерството направило штета на граѓаните и издавало документи со невалиден рок.
Исто така, и до Уставниот суд се поднесени 5 иницијативи во врска со личните карти, возачките дозволи и пасошите. Иницијативите се однесуваат за периодот на издавањето на овие лични документи, односно на нивното времетраење бидејќи некои сѐ уште се со важност, како и на правото на слобода на движење.
Поранешниот министер Спасовски веќе цел месец пропадна во земја. Тој последно се појави на владина седница, а претходно уверуваше дека граѓаните нема да бидат казнувани поради рокот даден во Преспанскиот договор на кој Македонија се обврза.
