Душица Димитриевска не размислува за оставка од челната позиција во Обвинителскиот совет. Претседателката на Советот ова го изјави денеска, откако Весна Дамева си замина од претседателската функција во Судскиот совет. Таа вели дека членовите во советот, работеле според законите.
- „Ние како институција, нашите заложби се борбата против корупцијата и придонес во таа борба. Ние сме на линија со сите други институции кои се залагаат за борбата против корупцијата. Сметам дека ние како Совет не сме дозволиле во ниту еден момент да бидеме посочени во негативен контекст во ниту еден од извештаите, ниту од домашните експерти ниту од меѓународните. Така да нашата работа ја вршиле согласно законот, согласно нашите законски надлежности, непристрасно така и ќе продолжиме. Не не можам да коментирам изјави на политичари, не би сакала.. Оставка нема да поднесете? – Не, не размислувам“ одговори Димитриевска
Советот на јавните обвинители оцени и дека Љупчо Коцевски не вршел влијание на суспендираниот виш јавен обвинител Мустафа Хајрулахи, иако тој тврдеше дека доставил службни белешки за да ги докаже притисоци од републичкиот обивнител.
- „До Совет на ЈО, беше поднесено известување со прилог службени белешки од вишиот јавен обвинител и јавен обвинител од Вишото јавно обвинителство. По дискусијата членовите донесоа заклучок дека не е извршено влијание врз работата на вишиот јавен обвинител и јавниот обвинител од ВЈО во Скопје и не е нарушена самостојноста во нивното работење“ рече Димитриевска.
Претседателката Димитриевска и нејзиниот колега Башким Бесими ќе останат членови и во Управниот одбор на Акдемијата, иако Антикорупциска смета дека тоа е спротивно на законите и има судир на интереси. Антикорупционерите најавија дека ќе ја чекаат конститутивната седница на Управниот одбор за да видат кои дејствија ќе ги преземат ако спорните членови не си поднесат оставки. Според ДКСК, Димитриевска и Бесими од обвинителскиот и Ханиф Зендели и Антоанета Димовска од судскиот совет не смеат да извршуваат двојна функција.
