Успешно издадена новата 10-та по ред еврообврзница во две транши од по 500 милиони евра или вкупно една милијарда евра. Првата е со помала рочност од 4 години и каматна стапка од 3,875%, а другата е издадена на 8 години со каматна стапка од 4,75% што според надлежните се најниски каматни стапки согласно пазарните услови. Министерката за финансии е задоволна од огромниот интерес на инвеститорите чија побарувачка во еден момент достигнала и 4 милијарди евра, што според неа е доказ за довербата во македонската економија. Димитриеска Кочоска вели дека македонската еврообврзница ја купиле познати инвестициски банки од САД, Британија и Германија кои веќе вложувале во македонски хартии од вредност, но и нови вложувачи како пензиски фондови. Таа смета дека е успех постигнатата рочност од 8 години, за разлика од претходните издавања на краток рок кои го зголемиле притисокот за враќање огромни долгови за само неколку години.
Со оваа еврообврзница, планирано е да се изврши исплата на еврообрзницата од 2020 година во износ од 700 милиони евра и се обезбедуваат средства за покривање на буџетскиот дефицит којшто е насочен кон реализација на развојните проекти. Министерката е задоволна од постигнатите каматни стапки. Вели дека тие се меѓу најповолните во регионот, а другите држави се задолжувале многу поскапо.
Издавањето на еврообврзницата е планирано во годинешниот буџет. Во текот на 2026 година, Министерството за финансии треба да врати надворешен долг од околу 890 милиони евра. Внимателното и домаќинско задолжување е направено бидејќи Министерството за финансии треба во следните 5 години да враќа долгови во вкупна вредност од 8,8 милијарди евра, направени од претходната влада.
