Новите членки да се откажат од правото на вето, одлуките да се носат со квалификувано мнозинство наместо со консензус, но со вградена рачна сопирачка. Таа заштитна клаузула предвидува доколку некоја земја има нешто спорно, тоа да го упати како прашање во Европскиот Совет. Германскиот „Тејбл медија“ објавува дека ова треба да бидат главните измени во нацрт законот за реформи, кој го подготвува еврокомесарката за проширување Марта Кос. Во нејзиниот текст се предвидува и на членките да им бидат одбиени финансиски средства, ако назадуваат во областите на владеење на правото или ги загрозат интересите на Унијата.
-По приемот, новите членки во ЕУ треба да се откажат од правото на вето на одлуките донесени со консензус во Унијата, а постои и можност да им бидат одбиени финансиски средства доколку назадуваат во областа на владеењето на правото или ги загрозат интересите на Унијата, според предлогот за реформа на процесот на проширување на ЕУ, пишува „Тејбл медија“.
Целта на Кос е и да се најде наједноставен начин за пофлексибилно носење одлуки, без измена на договорот за функционирање на ЕУ, кој предвидува задолжително едногласно донесување одлуки во надворешната и безбедностата политика и одредени финансиски прашања.
-Како дел од чекорите за забрзување на донесувањето одлуки во новата, потенцијално значително поголема ЕУ, се предвидува дека секогаш кога е можно, наместо консензус, одлуките ќе се донесуваат со квалификувано мнозинство. Сепак, би била вградена и „рачна сопирачка“, која предвидува можност членката да го проследи спорното прашање до Европскиот совет. Исто така, се споменува механизмот од Јанина, кој предвидува колкав процентен удел во вкупното население на ЕУ и удел во бројот на членки на ЕУ е потребен за да се блокира одлуката, изјави „Тејбл медија“.
Нацрт-законот за реформи го подготви комесарката за проширување на ЕУ, Марта Кос, а во него се наведува дека поголема ЕУ бара побрзо и поефикасно донесување одлуки. Кос планира да презентира нацрт-закон наречен „Анализа на политиките пред проширувањето“ на 30 септември.
Матеја Петровски
