Директорот на индустриските зони, Гоце Димовски, се сретна со Матиас Лау-Бенштајн, директор на германската технолошка компанија „Хајделберг Пост-Прес“, која е светски лидер со 175 години традиција во машинското инженерство и индустриските иновации. На средбата биле презентирани можностите што ги нуди Македонија преку Технолошко-индустриските развојни зони, а како најперспективни локации биле разгледани ТИРЗ Скопје и ТИРЗ Штип за потенцијално отворање нов производствен погон на германскиот инвеститор.
Директорот на германската компанија, Лау-Бенштајн, посочил дека пристапот до квалфикувана работна сила, како и транспарентната институционална поддршка, се клучни фактори во нивната анализа за избор на нова локација. Германската компанија „Хајделберг Пост-Прес“, која обезбедува напредни решенија во пакувањето, дигиталното печатење, автоматизацијата и зелените технологии, во моментов е во процес на проширување и разгледува нови пазари.
