Ништо не е случајно, Артан Груби на црната е јасна порака за ДУИ, опозицискиот гнев да не се обидува да го троши со обиди за дестабилизација и предизвикување некакви инциденти во државата, само за сопствен спас. Според познавачите не е случаен ниту тајмингот кога САД одлучи да ги објави новите имиња од Македонија за кои вели дека се вмешани во криминали, во моменти додека Ахмети се заканува со немири, доколку Уставниот суд одлучи да го промени или укине законот за употреба на јазиците.
-Ништо не е случајно, ни тајмингот, ни причината, ни потегот. Црната листа на САД не ја креира некоја невладина организација од некое градче во Америка, туку ја креира систем на иституции. А ДУИ како ДУИ мислам дека со ова со Артан Груби претрпе страшен политички удар, кој што е само врвот на пирамидата која што допрва ќе се анализира надолу, па да видиме кој што јадел, кој што пиел и кој што треба да плати на крај, изјави Јонуз.
Според Агим Јонуз ова покажува дека американската администрација верува во искрените намери на власта во Македонија, да влезе во сериозна борба со криминалот и корупицјата. Политичкиот аналитичар смета дека САД му дава веќе и јавна поддршка на Христијан Мицкоски и неговите цели во оваа борба.
-Мислам дека Американците дефинитивно почнуваат да му дуваат во крилата на Мицкоски, затоа што тој сериозно презема чекори, обиди да покаже дека сака да воведе ред ваков или таков, тоа е процес, тоа не може преку ноќ. Меѓутоа мислам дека пораката на Американците во овој момент е дека треба сепак да се остави Мицкоски да си ја работи работата, изјави Јонуз.
Дека целта на протестите на ДУИ пред Уставниот суд е подбуцување на меѓуетничките односи, за да го тргнат вниманието од себе и да се одбранат од сомнежите за криминали сторени од екс функционери минативе години, предупредуваа познавачите на политичките случувања . Експертите порачуваат дека сега на ред се обвинителите и судиите да ја сработат својата работа и да има одговорност за криминалните функционери.
Матеја Петровски
