Потпретседателот на Владата и министер за транспорт, Александар Николовски, денеска оствари работна средба со Герет Томас, министер за економија и извоз во Владата на Обединетото Кралство, како дел од дводневната посета на високо ниво на Велика Британија.
По средбата, вицепремиерот Николовски изјави:
„Во рамки на оваа посета на високо ниво, денеска остварив средба со министерот за извоз и економија на Велика Британија, Герет Томас. Разговаравме за продлабочување на економската соработка помеѓу двете земји, имајќи предвид дека Велика Британија е втор трговски партнер на Македонија. Во моментов Македонија извезува околу 2,5 милијарди евра во Велика Британија, а нашата цел е овој извоз да порасне и да достигне над 3 милијарди евра во блиска иднина. Ова ќе биде од голема корист за македонската економија, бидејќи значи добро платени работни места и создавање нови работни позиции.“
Николовски истакна дека на средбата со министерот за извоз и економија на Велика Британија, разговарале и за значајни инфраструктурни проекти, како што се развојот на железницата, автопатите и авиосообраќајот.
„Разговаравме и за можностите што Велика Британија ги нуди за поддршка на Македонија, вклучително и финансиските можности и експертизата која може да ја понуди“, додаде Николовски.
„Како дел од нашата посета, имавме средба со компанијата Crossrail, која е поддржана од британската влада и која ја изведе првата целосно дигитализирана метро линија во Велика Британија. Ова е значајно искуство кое може да биде корисно за нашите инфраструктурни проекти“, рече Николовски.
Тој информираше дека денес ќе се одржат и средби со претставници на финансиски институции и други важни институции во Лондон, како и со Извозната агенција на Велика Британија. Во текот на утрешниот ден продолжуваат средбите со министерот за Европа, специјалниот пратеник за Западен Балкан и Министерството за надворешни работи.
„Сметам дека оваа посета е значаен чекор во зацврстувањето на соработката помеѓу Македонија и Велика Британија. Со ова, Македонија ќе се позиционира како стратешки партнер на Велика Британија во Југоисточна Европа, што ќе донесе долгoročни придобивки за сите наши граѓани. Велика Британија има огромна традиција и силна економија, и верувам дека ова партнерство ќе има долг и успешен развој“, заврши вицепремиерот и министер за транспорт, Александар Николовски.
