Македонија има голем потенцијал за развој на авиосообраќајот и туризмот и тоа во континуитет се потврдува. 28 нови дестинации, раст од 40 проценти во авио-сообраќајот, преку 20 проценти раст на туристите е јасен показател дека интересот за Македонија расте.
Целта на Владата е овој тренд да го претвори во нови авиолинии, повеќе туристи и нови инвестиции и остануваме отворени за соработка, посочил вицепремиерот и министер за транспорт Александар Николоски на работната средба со претставниците на меѓународната туристичка групација „Корендон“.
На средбата, како што информира Кабинетот на министерот, Николоски го истакнал огромниот потенцијал на Македонија како туристичка и авио-дестинација, особено во услови на континуиран раст на воздушниот сообраќај и зголемен прилив на странски туристи.
„Корендон“ е истакната меѓународна туристичка групација и една од трите водечки туроператори во Холандија и Белгија. Групацијата нуди пакет-патувања до повеќе од 50 дестинации.
