Новиот републички јавен обвинител треба да биде искусен професионалец кој ќе знае да се одбрани од политичките притисоци, бидејќи таа висока позиција мора да се заслужи и доселедно и одговорно да се работи. Според познавачите новиот шеф во ОЈО треба да биде се’ спротивно од Љупчо Коцевски. Поранешниот претседател на Антикорупциска Воислав Зафировски за Алфа вели дека заминувањето на досегашниот главен обвинител е само еден од потезите кои треба да почнат да ја враќаат довербата во правосудството.
-Се она што го работеше и се она што се постигна во изминатиот период, говори дека не беше дораснат за позицијата и одговорноста која ја носи таа позиција. На Македонија и треба јавен обвинител, републички, државен јавен обвинител кој е пред се професионалец, кој е човек со интегритет, кој е независен, изјави Зафировски.
Загрижувачки се бројките за довербата во правосудниот систем во државава. Според Зафировски во тој сегмент придонесе и сега веќе екс шефот на Јавното обвинителство. Вели неговиот наследник мора преку професионален однос да ја заслужи независноста која треба да ја има целото правосудство.
-Сите тие критики кои упатуваат на тоа дека наводно има политички непринципиелен притисок врз заминувањето на Љупчо Коцевски од позицијата републички јавен обвинител се неосновани. Притисокот е од јавноста, знаете што значи два проценти доверба од јавноста, тоа значи дека републичкиот јавен обвинител и воопшто судската власт не ја заслужуваат независноста, изјави Зафировски.
Коцевски пред неколку дена си поднесе оставка во ист ден кога беше закажана седницата во Собранието на која ќе се расправаше за неговото разрешување.
Спроред Законот за јавното обвинителство, вршителот на функцијата треба да биде определен од редот на јавните обвинители во ОЈО.Во игра се Златко Биковски, Анита Тополова Исајловска, Исмаил Дарлишта, Соња Симовска, Ферат Елези, Џелал Бајрами, Елвин Вели, Лиле Стефанова.
Матеја Петровски
