Анализите што се спроведуваат врз основа на Стратегијата за развој на воспитно-образовниот систем во Штип ќе бидат завршени до крајот на учебната година. По нивното комплетирање ќе се донесе и конечната одлука за идната организација на основното образование во градот, најави градоначалникот на Штип, Иван Јорданов.
Во опција се две решенија – фузија на одредени образовни институции со други училишта или намалување на бројот на паралелки во сите училишта, што би значело и намалување на бројот на наставници. Јорданов појасни дека во моментот не постои одлука од Општина Штип и Советот на општината за затворање на основното училиште „Гоце Делчев“.
„Факт е дека во Штип досега имаме вештачки паралелки кои се со несоодветен број на ученици и под законскиот минимум. Стратегијата за оптимизација на ресурсите предвидува формулата за пресметка на блок-дотациите кои Општина Штип ги добива од МОН да се пресметува платата и блок-дотацијата по број на ученици, а не по број на паралелки“, изјави градоначалникот на Штип, Иван Јорданов.
Друг проблем со кој се соочува ова штипско училиште е и сегрегацијата, за која веќе и Судот за човекови права во Стразбург има донесено пресуда. Според Јорданов, овој проблем мора системски да се реши и да не се дозволат етнички хомогени паралелки.
„Не смее да се дозволи во еден клас или училиште да имаме чиста ромска или чиста македонска паралелка. Такви услови во ООУ „Гоце Делчев“, за жал, нема. Низ минатото сме пробале низа мерки, но за жал без плод“, изјави Иван Јорданов, градоначалник на Штип.
Јорданов истакна дека веќе се остварени средби со наставниот кадар во училиштето, а најави и средба со Советот на родители, со цел сите засегнати страни да бидат вклучени во процесот.
