Четири автобуси на ЈСП целосно изгореа само во изминатите шест месеци. Нема крај на хаосот со јавниот градски превоз. Откако викендов целосно изгоре уште еден автобус на „ЈСП“ во Сопиште граѓаните го креваат гласот.
Револтирани се бидејќи никој не води сметка за безбедноста со јавниот градски превоз. Пред камерта на „Алфа“ велат дека се плашат да се возат во нив, но друг избор немаат. Бараат од надлежните поголема свесност и ажурност, затоа што нивните животи се доведени во прашање.
Возниот парк на „ЈСП“ не е променет повеќе од една деценија, па затоа се почесто се случиваат хаварии. Сите автобуси кои до сега изгореа беа со патници, но за среќа не се случи поголема трагедија. Синдикатите предупредуваат дека во моментов само 40% од автобусите се исправни.
Од Конфедерацијата на слободни синдикати, ги отфрлија изјавите на директорот на „ЈСП“, Кушевски за некаква саботажа. Побара истрага за последниот случај во Сопиште каде изгоре автобусот со број 58.
„Директорот кажува дека некој политички му го запалил автобусот. Па еве обвинителство, судииве, овие што ги напаѓаме, нека каже како политички бил запален. Зошто на нас шоферите ни кажуваат дека моторите целите се со масло и не се променети. Да видат дали можеби од тоа се запалил“, изјави претседателот на КСОМ, Марјан Ристевски.
„ЈСП“ минатата година од Европската унија доби шест еколошки автобси кои се уште стојат во гаражите. Кушевски рече дека постапката за нивно осигурување е завршена и сега се очекува само регистрацијата за да се пуштат во сообраќај.
Инаку во јули минатата година се запали автобус на „ЈСП“ во Бутел. Причината тогаш беше електрична инсталација. истиот месец претходно се запали мотор на автобус во Транспортниот центар кај Железничка, а во ноември минатата година гореше и возило на „ЈСП“ во Злокуќани.
Љубиша Владимиров
