Нема никаква гаранција дека ни по 29 август кога советниците ќе ја изгласаат програмата на Арсовска за санирање на хаосот во Скопје, метрополата ќе профункционира нормално. Јавните претпријатија ЈСП и Комунална хигиена ќе добијат средства за поправка на 30 автобуси и ангажирање на диополнителен персонал за чистење на отпадот, но дали тоа ќе биде доволно оттаму не даваат конкретен одговор. Од ЈСП за Алфа велат дека ќе направат се за да стават повеќе автобуси во оптек но нема никаква гаранција дека скопјани нема да мораат и натаму да чекаат со часови на јавните постојки.
„Значи ние ќе направиме се што е во наша моќ да се стават повеќе автобуси во сообраќај. Но тука зависат низа фактори. Бидејќи се работи за краток временски период некои од автобусите се сервисираат надвор од сервисите на ЈСП, а другите што се сервисираат тука чекаме одредени делови од добавувачите. Во котенкст на тоа имаше и дека ќе се одредеи одредена финансиска помош за ЈСП за да може да се сервисираат тие автобуси, значи работите се малце покомплексни, не може никој да ви даде гаранција, но условно мислам дека ќе успееме голем дел од автобусите, од тие 30 да ставиме во оптек“, рече Драги Кушовски, директор на ЈСП.
Од Комунална хигиена и новиот директор засега не добивме никаков одговор дали по изгласувањето и ангажирањето на новите 120 сезонски работници, конечно ѓубрето ќе се собира навреме и скопјани нема да мора да гледаат преполните контејнери и расфрланиот отпад околу нив.
По вчерашниот состанок со градоначалничката Арсовска, претседателот на Советот во градот Скопје, Трајко Славески, рече дека Владата била подготвена дел од средствата кои што стојат неискористени наменети за инфраструктурен проект, да ги префрли на ЈСП за рехабилитација на одреден број на автобуси. Но, за него е нејасно зошто јавните претпријатија досега не правеле ништо со застаерната механизација иако од страна на Советот имале одобрени инвестициски планови.
По вчерашниот состанок со советниците на Град Скопје градоначалничката Арсовска ги избегна новинарите. Премиерот Мицкоски кој лично се ангажираше за да се среди хаосо, повика советниците да го поддржат планот, но изрази сомнеж дека со тоа и навистина ќе се решат проблемите на Градот кои ескалираа под раководството на Арсовска. Мицкоски ја повика градоначалничката да создава пријатели, наместо непријатели.
Љубиша Владимиров
