По алармот за западно-нилската треска, Агенцијата за храна и ветеринарство е преплавена со повици и пријави за угинати птици.
Од таму велат дека на бесплатната телефонска линија, на електронската адреса и преку други канали во изминатите денови пристигнале стотина пријави од граѓани. Оттаму апелираат да не се создава непотребна паника при појава на поединечна угината птица во урбана средина, вклучително и гаврани и други диви преселни птици. Од Агенцијата посочуваат дека особено внимание треба да се посвети само доколку на исто подрачје и во краток временски период се забележи поголем број угинати гаврани или други диви птици. Во такви случаи, граѓаните треба да ја известат надлежната служба и да избегнуваат директен контакт, допирање или преместување на угинатите птици.
Апелот доаѓа откако надлежните институции во понеделникот посочија дека гавраните се меѓу најчесто идентификуваните резервоари на западно-нилската треска и дека секоја забележана мртва дива птица треба да биде пријавена.
