Стратешкото партнерство помеѓу Македонија и Обединетото Кралство отвора многу можности за зајакнување на економските, безбедносните и политичките врски. Ова дополнително ќе ги зајакне позициите на Македонија и во Соединетите Американски Држави, со кои одамна имаме договор за стратешко партнерство, сметаат експертите. Со оглед на фактот дека во изминатите неколку години се случуваат повеќе пресврти на глобално политичката сцена, посебно по војната во Украина и победата на Доналд Трамп во Америка, земјите се обидуваат да се репозиционираат.
Нашето партнерство не ги зајакнува само нашите билатерални односи туку и односите со земја која е важен сојузник во НАТО Алијансата и истовремено има тесни врски со САД за разлика од други држави од ЕУ. Тоа не значи напуштање на нашиот пат кон ЕУ но нашите економски, безбедносни, политички врски со САД ја зајакнуваат и улогата на македонија во регионот и Западниот Балкан, вели поранешниот вицепремиер за евроинтеграции, Васко Наумовски.
Според Наумовски, овој договор со Обединетото Кралство доаѓа во клучен момент, посебно ако се земе предвид комплицираната геополитичка ситуација со односите помеѓу САД и Европската Унија. Во оваа ситуација, Британија се јавува како мост помеѓу овие две западни сили.
Но, партнерството со Лондон освен што ќе придонесе за зголемување на соработката во рамки на НАТО и ќе ја зголеми безбедноста, туку ќе овозможи до сега, најсилна економска соработка меѓу двете влади, капитални инвестиции во инфраструктурата, енергетиката, науката, здравството, образованието…
За разлика од некои држави од ЕУ, британската економија се наоѓа во една ситуација каде компаниите од оваа држава може да инвестираат во различни држави од светот. Ние имаме многу инвестиции но сега се добива шанса за уште повеќе, но и дополнително придонесува и за размена на искуства, експертиза, пред се во финансискиот сектор што ќе помогнат во спроведување на реформите во економијата, додава Наумовски.
Партнерството помеѓу Македонија и Обединетото Кралство претставува важен чекор во надградување на надворешната политика на земјата, особено во контекст на динамичната и често непредвидлива геополитичка сцена, сметаат експертите.
Оваа соработка ја позиционира Македонија како активен чинител во рамки на НАТО и во поширокиот трансатлантски контекст, а со Британија како мост меѓу САД и Европската Унија, македонските интереси добиваат нова димензија на стабилност, безбедност и економски потенцијал.
