Намалувањето на цените на катастарските услуги, значаен чекор за олеснување на граѓанските давачки кон државата. Најавеното повеќекратно намалување на цените на катастарските услуги кое треба да стартува веќе од септември, а кои претходната власт во февруари ги зголеми дури за 300 насто, е уште еден обид на актулената власт за олеснување на граѓанските давачки кон државата со што ќе се заштити и нивниот стандард. Според граѓаните, иако катастарските услуги не се услуги од секојдневна нужност, сепак нивното вреднување по некои пристојни цени и тоа како е важно за скромниот македонски семеен буџет.
„И сиромасите нека видат малку убавина, бел ден. Тоа е добро. Се’ што се намалува, се’ е убаво. „Претходната власт многу ги зголеми цените на услугите. Претераа. А ова е во ред“. „Тие што имаат имоти, тие нека се секираат. Ние што ги имавме имотите веќе ги немаме. За нас, еднаш на десет години, тоа не значи многу“. „Па, треба да го намалат, ние со мали пензии сме, 38 години стаж имав, 11.000 пензија зедов“. „Треба да се намали, високи се цениве, било за тоа, било за овие прехранбениве производи“. „Нешто подобро ќе дојде за граѓаните така, ама инаку, ако има повеќе пари, пак ќе остане за во Буџетот да има пари. И граѓаните да имаат пари, а и за во Буџетот да остане треба“.
Од друга страна, она на што во најскоро време се надеваат граѓаните е дека ваквиот тренд на зауздување на со години галопирачките цени, ќе почне да се применува и во нивните секојдневни граѓански потреби: телефонијата, струјата, здравството, храната.
„Одржување на струјава е пет стотки, одржување на линијата – 450, значи за струјава – илјадарка. Што да зборуваме повеќе? Тоа треба да го укинат“.
Инаку, како што веќе е познато, премиерот Мицкоски вчера најави враќање на стариот Тарифник за катастарски услуги, односно како што беше до февруари годинава кога Агенцијата одлучи да ги поскапи своите услуги дури за 300 насто. Сега, уписот на стан и сите придружни елементи, како квадратура, земјиште, заеднички простории, гаражи ќе се врши одеднаш и тоа ќе чини 1250 денари. Во последниве 7 месеци за овие услуги граѓаните плаќаа најмалку по 3.750 денари. Со ова поевтинување се очекува дека повеќе од еден милион евра ќе останат во џебовите од граѓаните, потоа ќе се забрза процедурата за добивањето на овие документи, а ќе им се стави крај и на корупцијата и криминалот во овој сектор.
Каролина Дурло
