Нафтени султани од Пласница. Таткото Имсаил пратеник, чичкото Алија градоначалник, а младиот Асмир Јахоски најголем снабдувач со нафта за државата во владеењето на СДСМ и ДУИ. Пуцко Петрол важеше за еден од омилените тендер партнери на претходната владина гарнитура.
Нафтената компанија чиј сопственик сега е меѓу осомничените за криминал тежок речиси 170 милиони евра за набавките со мазут, изминативе пет годни склучила вкупно 1776 договори за јавна набавка во вкупен износ од 137 милиони евра.
За овие зделки и за можните криминални злоупотреви на државни пари ТВ Алфа пишуваше и предупредуваше изминативе години.
И антикорупционерите и експертите и јавноста реагираа за матните зделки, но тоа не ја спречуваше компанијата да добива бројни тендери од претходната власт. Уште пред три години познавачите пред нашата камера говореа дека тоа е класичен судир на интереси и тргување со влијание.
-Најчесто судирот на интереси го гледаме во постапките за јавни набавки и ние постојано зборуваме дека за време на избори, кој ќе обезбеди поддршка и ќе победи на изборите, може да смета на тоа дека понатаму ќе има добар бизнис, односно ќе може да работи со тендери и тоа правило ниту еднаш не било непотврдено. Кој и да дојде на власт секогаш истото се случува и на ниво на општини, на ниво на институции и на повисоко ниво на политиката, посебно кога зборуваме сега за енергијата, изјави тогаш Слаѓана Тасева за Алфа.
Низ текот на годините од една бензиска во кичевска Пласница, со еден вработен, Пуцко Петрол стана еден од водечките гиганти во нафтениот бизнис во Македонија. Со семејно- бизнис- политичките врски на оваа компанија минативе години се занимаваа и антикорупционерите.
-Конкретно се што се однесува во премдетот ќе биде соопштено, кај нас, ошто во Македонија, имаме повеќе проблем со влијание отколку судир на интереси. Значи, влијание може да има и каде што нема судир на интереси, а влијание постои. Тоа е факт, изјави тогашната претседателка на ДКСК, Билјана Ивановска.
Пуцко Петрол сега е во центарот на големиот скандал поради сомнежи за криминал од речиси 170 милиони евра. Асмир Јахоски наместо во Шутка, заврши во куќен притвор како еден од осомничените за перење пари и злоупотреба на службената положба.
Матеја Петровски
