Втор ден се чисти водата од поплавените куќи во скопски Сарај. Триесетина домови ја поминаа ноќта под вода, а поплавите зафатија пет села. Општинска механизација, противпожарната и Водовод им помагаат на локалните жители да ги исчистат подрумите, приземјата и дворовите, а паралелно се чисти речното корито каде завршувал градежен шут од граѓани и фирми.
Оние кои беа поплавени ноќта ја поминале на повисокиот кат или кај роднини, а штети допрва ќе бројат. За среќа велат, само материјални.
Општински екипи веќе се на терен и прават проценки за штетите.Сите кои имаат уништени поседи и домови може да пријавуваат до 23 февруари. Инспекции постапуваат и за недозволеното депонирање отпад во речното корито, вели градоначалникот Елмази.
- „За жал, од првичните информации, поради поплавите и икс фирми кои градежните отпадоци ги фрлале во речното корито. Комисијата за проценка е веќе на терен, ќе ги посетат сите домови и да направат проценка. И согласно процедурите ќе се достават до Владата“ рече Мухамет Елмази – Градоначалник на Општина Сарај.
Помош од Центарот за Управување со кризи поради поплавите побарале повеќе од 120 луѓе. Поплавени куќи има и во гостиварско, Врапчиште и Маврово и Ростуше, а во село Беловиште успешно биле извлечени заглавени луѓе.
- „Имавме критична состојба во Општина Гостивар, поточно во селото Форино каде беше излеана реката Вардар, денеска и таму ситуацијата се подобрува и водата се повлекува. УХМР очекува врнежи повторно во западниот дел и таму сме во контакт со сите надлежни за да ја следиме ситуацијата,“ рече Мухамед Али – Директор на Центарот за управување со кризи.
Реката Слупчанка, кумановско Липково, се излеала на два места, но поплавено било само земјоделско земјиште. Во Кратово и Крива Паланка не се регистрирани поплави.
Во тетовскиот регион, интензивните врнежи предизвикаа зголемен водостој и проблеми со одводните канали. Свлечишта го блокираа патниот правец Тетово – Џепчиште, кој е затворен за сообраќај, додека патот кон селото Једуарце е повторно прооден.
На делницата Тетово – Попова Шапка сообраќајот се одвива отежнато, а има забрана за тешки товарни возила и автобуси. Таму засега нема опасност од излевање на поголемите водотеци, а снабдувањето со струја и вода е стабилно.
