Претставници од Министерството за енергетика, рударство и минерални суровини оствариле средба со германската развојна банка KfW, на која биле разгледани можностите за продолжување и унапредување на соработката во енергетскиот сектор.
Во фокусот на разговорите, како што соопшти Министерството за енергетика, биле можностите за вклучување на KfW во поддршката на нови проекти и активности во текот на следната година, како и прегледот на тековните проекти, нивната реализација и досегашниот напредок.
Посебно внимание било посветено на можностите за обезбедување техничка помош и експертска поддршка за потребите на Министерството, со цел зајакнување на институционалните капацитети и унапредување на процесите за планирање и реализација на стратешките енергетски проекти.
– Министерството за енергетика останува посветено на развивањето партнерства со меѓународните финансиски институции, кои придонесуваат за модернизација на енергетскиот сектор, зголемување на енергетската сигурност и забрзување на енергетската транзиција. Соработката со KfW претставува значајна основа за разгледување нови можности за инвестиции, размена на експертски знаења и поддршка на проекти од стратешко значење за енергетскиот систем на државата – велат од ресорното Министерство.
