Спасен видот на 13 годишно момче со трансплантација на рожница. Лекарите од Клиниката за очни болести инфорираат за успешно пресадени уште 15 ткива. Сите пациенти се на возраст од 13 до 80 години. Интервенциите се реализирани со поддршка од националната координаторка за трансплантација, Билјана Кузмановска, како и американски медицински тим од Duke University.Ова според офталмолозите е значаен чекор за развојот на очната хирургија во земјава и подобрување на квалитетот на живот кај пациентите.
“Тоа е микрохируршка процедура која бара голема прецизност и се изведува без примена на шевови. Овие процедури за првпат се изведуваат во нашата земја и на Клиниката за очни болести, а генерално се ретки и во регионот. Најмладиот пациент кај кого беше извршена пенетрантна кератопластика е момче на 13-годишна возраст, што уште еднаш ја покажува неопходноста од обезбедување навремена и високоспецијализирана здравствена грижа“, кажа д-р Трпевска-Шекеринов.
“Сакам да ја потенцирам важноста на трансплантационата медицина. Значи трансплантацијата, покрај тоа што спасува живот, гледаме дека и го подобрува квалитетот на живот. Имаме пациенти коишто биле слепи, а сега ги излекуваме од слепило. Меѓутоа, сето тоа е благодарејќи на донирани ткива” – вели Проф. д-р Кузмановска.
За да се зголеми свесноста за органодарителство ќе се менува законот за трансплантација на органи најави министерот за здравство. Измените на законот се очекува да поминат низ собраниска процедура кон средината на април.
Во Македонија се уште има многу мал број на луѓе кои се одлучуваат да донираат органи алармираат надлежните. Иако свеста полека расте,бројките покажуваат дека семејствата често ја стопираат оваа одлука.Минатата година 13 пациенти биле подготвени да станат донори на органи. Но на крајот, само тројца навистина донирале. Кај останатите десет случаи, семејствата не дале согласност.
