Јавното претпријатие за државни патишта (ЈПДП) најавува изградба на две нови клучки на експресниот пат Крива Паланка–Страцин со цел подобра поврзаност со локалната патна мрежа. Ќе се градат клучки кај местото „Десетак“, којашто треба да ја подобри поврзаноста со село Отошница и кај Петралица за полесен пристап до Технолошко индустриската зона Ранковце.
Како што објави ЈПДП на својата фејсбук страница, проектната документација за двете клучки е во финална фаза и се очекува нивно одобрување од страна на надлежните институции.
Директорот на ЈПДП Коце Трајановски и градоначалникот на Општина Ранковце Борче Спасовски биле на терен на локациите каде што ќе се градат новите две клучки.
– Со изградбата на двете клучки ќе се овозможи: побезбеден и поефикасен сообраќај; подобра поврзаност со локалната патна мрежа, подобар пристап до образовни, здравствени и економски центри, поттик за локален развој, туризам и инвестиции, информираат од ЈПДП и истакнуваат дека остануваат посветени на изградба на модерна и безбедна инфраструктура низ целата држава.
