При исклучително реткиот настан за пречек на првото изгрејсонце од Новата 2026 година на врвот „Антена“ на Пелистер, на надморска височина од 2601 метар и температура од -28 степени Целзиусови, рано утринава се случи несекојдневно запросување. Искусниот планинар Дарио Петровски ја побара за жена својата понежна половина Мишела Панајотова, која исто така е пасионирана вљубеничка во планината.
Инаку, овие двајца млади луѓе живеат и работат во Германија, а годинава се вратиле дома за да учествуваат во манифестацијата „Први на Први“, која е дел од годинашната битолска Зимска приказна, но и да се заколнат на вечна љубов во првото јануарско утро. Двајцата млади беа дел од тимот искусни планинари од Планинарско-спортскиот клуб „Олимпус Монс, кои ја реализираат манифестацијата „Први на Први“ – искачување до врвот „Антена“ со цел да се доживее првото игрејсонце во Новата година. Ова воедно се смета и за прв спортски настан одржан годинава во државава, но и пошироко во Европа.
„Поради ниските температури од -28 степени и ветрот од околу 50 км/ч искачувањето се одвиваше во многу отежнати услови. И покрај тоа што станува збор за искусни планинари, беше потребно да се вложи многу повеќе сила за да се совладаат алпските климатски услови кои ги имаше ова утро на Пелистер“, – изјави Иванчо Тошевски, организатор и претседател на ПЗ „Олимпус Монс“ и директор на НП „Пелистер“.
При годинашното искачување кое започна пред полноќ, учествуваа над 50 искусни и познати планинари од 10 градови од Македонија, Црна Гора и Германија. Искачувањето е под покривителство на општина Битола и годинава се организираше по петти пат, а целта е да се дочека првото изгрејсонце во Новата година од еден од најубавите природни видиковци на Балканот.
