Во Тиквешко се верува дека на денешниот верски празник Преображение на Господ Исус Христос, за првпат во годината треба да се набере грозје, потсетуваат од Музеј галеријата во Кавадарци, во врска со дел од обичаите во етничкиот предел Тиквеш, како традиција и култура на населението, кои се вкоренети и опстојуваат на овие простори.
– Според народното верување, на 19 август за првпат во годината се бере грозје и се носи во црквата каде што свештеникот по молитвата го благословува. Ова е чин на благодарност кон Господа за сите дарови на земјава. На Преображение во црквата се дава нафора и грозје. Тоа не е нафора во вистинската смисла на зборот, туку само благодарност кон Господа за плодовите – споделуваат од Музејот.
Во народот, велат, постојат повеќе верувања поврзани со овој празник. Притоа истакнуваат дека ова се дел од обичаите во етничкиот предел Тиквеш како традиција и култура на населението во кое се вкоренети и опстојуваат на овие простори.
– Поради заладувањето на времето се верува дека на тој ден се преобразува природата. Лисјето на дрвјата почнуваат да венеат, а и водата станува студена поради што на Преображение луѓето за последен пат се бањаат во реките. Очигледно празникот Преображение на Господ Исус Христос има длабока смисла во животот на нашиот народ. Еден важен период од годината кога и времето се преобразува, заладува и тргнува кон есента оставал впечаток и во свеста на нашиот народ, па така нашол место и во неговите верувања и во народните умотворби – додаваат од Музејот.
