Министерот за надворешни работи и надворешна трговија, Тимчо Муцунски денеска ќе престојува во работна посета на Хаг, каде ќе има средба со неговиот домаќин, шефот на холандската дипломатија Каспар Велдкамп.
– Централни теми во разговорите ќе бидат напредокот, развојот и перспективите на севкупните билатерални политички и економски односи со Холандија, како и иднината на процесот на проширувањето на ЕУ, и во тој контекст, натамошната холандска поддршка на македонската европска интеграција, информира Министерството за надворешни работи и надворешна трговија.
Покрај ова, се очекува министрите да разменат мислења и за актуелни прашања поврзани со внатрешно-политичките состојби во двете земји, односите во рергионот на ЈИЕ и регионалната соработка.
Во Хаг, министерот Муцунски заедно со директорот на Дирекцијата за технолошки индустриски развојни зони, Гоце Димовски, пред холандски бизнисмени во Холандска агенција за претпријатија ќе ги презентираат инвестициските можности кои ги нуди нашата земја во функција на привлекување нови холандски инвестиции.
