Инфлацијата во Македонија е споредлива со просечната инфлација во земјите од Централна и Источна Европа, рече вицегувернерката Ана Митреска на форум во организација на „Фајненшал тајмс“. Таа нагласи дека ваквите движења укажуваат на постоење заеднички регионални фактори што ја одредуваат инфлациската динамика, меѓу кои се растот на платите и кредитниот циклус, при што процесот на дезинфлација кај нас и во земјите од регионот е подолготраен во споредба со еврозоната.
Сепак, таа вели дека инфлацијата и понатаму се движи околу 4 отсто, што е над нејзиниот историски просек и над стапката на инфлација во еврозоната. Поставеноста на монетарната политика на Народната банка, според Митреска, има за цел да овозможи натамошно одржливо стабилизирање на инфлацијата и стабилни инфлациски очекувања.
Во услови на присутна неизвесност, монетарната политика ќе остане внимателна, а ако има потреба, Народната банка ќе ги употреби сите расположливи инструменти за зачувување на стабилноста на девизниот курс на денарот во однос на еврото и за обезбедување на ценовната стабилност.
Митреска очекува ваквата поставеност на монетарната политика да доведе до натамошно намалување на домашната инфлација.
