Светскиот ден на науката за мир и развоj – 10 Ноември оваа година го одбележуваме со видливи резултати во научно-истражувачката дејност. Ова го нотира и Европската комисија во Извештајот за напредокот на државата за 2026 со оценката дека е направен добар прогрес во остварување на целите од Акцискиот план на Стратегијата за паметна специјализација, со основањето и ставањето во функција на Агенцијата за иновации, научно – технолошки развој и претприемништво ИНОВА, но и со продолжувањето на учеството во европски програми за наука и иновации, соопшти денеска Министерството за образoвание и наука.
Резултатите, се додава во соопштението, ја покажуваат посветеноста на Владата и на МОН кон поттикнување на научните истражувања и иновациите.
– Имаме јасна цел: да ги зајакнеме капацитетите за научно-истражувачка дејност и да го зголемиме влијанието на научно-истражувачките резултати врз општеството и економијата. Ова го поддржуваме преку континуиран раст на буџетот за наука, за да осигурaме дека научната заедница има ресурси и поддршка што ѝ се неопходни – велат од МОН.
Оттаму додаваат дека годинaшниот буџет изнесува рекордни 773 милиони денари, што е скок во споредба со 680-те милиони денари минатата година и повеќе од двојно зголемување во однос на 380-те милиони денари издвоени пред две години.
– И резултатите се опипливи. Минатата година поддржавме 50-тина двeгодишни научни проекти, што се сега во завршна фаза – се додава во сооштението.
Од МОН нагласуваат дека презеле конкретни активности поврзани со потребата за зголемена научна продукција.
– Обезбедивме бесплатен пристап до главните глобални научни бази на податоци „Web of Science“ и „Scopus“ за нашите научници и академски професори. Ги покриваме трошоците за објава на научни трудови во списанија со импакт фактор, за организација на домашни и за учество на меѓународни научни конференции, ги покриваме трошоците за објава на зборници. Системски инвестираме во наука и ги отстрануваме бариерите за да можат нашите научни работници да се натпреваруваат и да соработуваат глобално, а нивните резултати да можат да донесат вистинска вредност дома. Наш стратешки приоритет останува забрзан развој на науката и подобро позиционирање македонските универзитети на глобалните ранг-листи – се додава во соопштението.
