Со еден клик на веб страната на министерството за образование, стотици илјади родители и старатели ќе можат да си ја симнат новата апликација за електронски дневник и да ги следат секојдневните училишни активности и оценките на нивните деца. Се што треба да направат е да го внесат истото корисничко име и лозинка што и досега ги користеле. Министерството за образование и наука, забрзано работи на целосна дигитализација на образовниот процес.
„Отсега во секое време ќе имаат брз пристап до информации за распоредот и содржината на часовите на нивните деца за редовноста на наставата, оправдани или неоправдани изостаноци, зададените домашни задачи, добиените оценики, издадените сведилтества и слично се од содржините на е-дневникот“, изјави министерката за образование Весна Јаневска.
Во апликацијата има архива на сите учебни години, односно родителите ќе можат кога сакаат да гледаат се, не само за тековната година. Во меѓувреме стручен тим ќе им биде достапен 24/7 за било каква корисничка поддршка.
„Веќе ја тестиравме и се уверивме во функционалноста на апликацијата. Сигурна сум дека ќе биде многу користена затоа што нема родител или старател кој не е заинтересиран да го следи и да учествува во образованието на своето дете“, изјави министерката за образование Весна Јаневска.
Министерството интензивно работи и на поставување на уште подобра интернет мрежа што треба да им овозможи поквалитетно предавање на лекциите на наставниците во ова време на дигитален живот.
Дигитализацијата е повеќе од потребна во образованието, а позитивните промени почнаа неодамна, откако учениците и студентите добија можност за стипендии да конкурираат по електронски пат. Студентите, исто така, на овој начин конкурираат и добиваат сместување во студентските домови, без да трошат време и пари за патување.
Љубиша Владимиров
