Нов лик на јавниот превоз во Скопје, но и во другите градови во Македонија. Автобусите кои доста често знаеја да се расипат при возење, но и да се запалат, полеќа ќе стануваат минато. Со одлука на Владата ќе се набавуваат 150 нови еколошки автобуси, 100, ќе добие главниот град на државата, додека 50 ќе има за другите градови, потврди премиерот Христијан Мицкоски.
-Градот Скопје во претходна анкета побара 250 вакви автобуси, за него ќе бидат отстапени 100, со 50 полначи, а останатите општини кои што имаат организиран градски превоз, мислам дека побараа 89, а ќе добијат 50, со 25 полначи, изјави Мицкоски.
Автобусите ќе бидат купени под многу поволни финансиски услови, како дел од стратешкиот договор Влада со Влада меѓу Македонија и Унгарија. Ќе се исплаќаат во текот на наредните 15 години.
-Ние на владина седница донесовме одлука, во рамки на Влада со Влада договорот што го имаме со Унгарија, дел ќе биде кредит под оние исти услови кои што ги имавме во претходниот случај, односно три години грејс период, дополнителни 12 години отплата, значи 15 години со истата каматна стапка, изјави Мицкоски.
Инаку, условите во јавниот превоз се еден од најголемите проблеми со кои долги години се справуваат и се жалат граѓаните на Скопје, но и на другите градови. Покрај самите услови во автобусите, проблем претставуваат и недоволниот број на возила, поради што доста често автобусите каснат на своите редоввни линии.
Матеја Петровски
